မြောက်ဒဂုံမြို့နယ်တွင် ပျောက်ဆုံးနေသည့် ကလေးငယ်ကို ဒဏ်ရာများနှင့်အတူ သေဆုံးလျက်ပြန်တွေ့ခဲ့ကြောင်း အဆိုပါကလေးငယ်၏ မိသားစုအသိုင်းအဝိုင်းမှ သိရသည်။
ကလေးငယ်မှာ မောင်မင်းခန့်ဇော်ဖြစ်ကာ ၁၃ နှစ်အရွယ်ရှိပြီး ဇွန် ၈ ရက် ညနေကျောင်းဆင်းချိန်တွင် နေအိမ်သို့ ပြန်လာခဲ့ကြောင်း၊ ညနေ ၄ နာရီခွဲခန့်တွင် အပြင်သို့ ရုတ်တရက် ထွက်သွားရာမှ ပျောက်ဆုံးသွားခဲ့ခြင်းဖြစ်သည်။
ယင်းသို့ ကလေးငယ်ပျောက်ဆုံးမှုနှင့် ပတ်သက်ပြီး မိသားစုဝင်များက လိုက်လံရှာဖွေခဲ့သော်လည်း မတွေ့ရှိရကြောင်း၊ ဇွန် ၁၀ ရက် နံနက် ၆ နာရီခန့်တွက် မြောက်ဒဂုံ ၃၈ ရပ်ကွက် ကန်ဘောင်တွင် ရုပ်အလောင်းကို ပြန်လည်တွေ့ရှိခဲ့ကြောင်း သိရသည်။
" ကျွန်တော့်တူလေး အနေအေးအေးလေးကိုမှ ဘယ်လိုလူမျိုးတွေက ရက်ရက်ဆက်ဆက် လုပ်ရက်လိုက်ကြတာလဲဗျာ။ ငါ့တူလေးရယ် မင့်အဖြစ်ကလဲဆိုးလိုက်တာကွာ။
ဘဝဆက်တိုင်းမှာ ခုလိုဖြစ်ဆိုးမျိုးမကြုံရပါစေနဲ့ကွာ။ ကျွန်တော့်တူလေး ဒီနေ့မနက် ၆ နာရီ မြောက်ဒဂုံ ၃၈ရပ်ကွက် ကန်ဘောင်မှာ dead ဘော်ဒီတွေ့ရှိခဲ့ပါတယ်။ စစ်ဆေးဖို့တွက် မြောက်ဥက္ကလာဆေးရုံကြီးသို့ သယ်ဆောင်သွားခဲ့ပါတယ်။ မျက်နှာကလဲဖောယောင်နေပြီး ဒဏ်ရာများလဲတွေ့ရှိထားပါတယ်" ဟု မိသားစုဝင်တစ်ဦးက လူမှုကွန်ရက်တွင် ရေးသားထားသည်။
ကလေးငယ်၏ ရုပ်အလောင်းကို ဇွန် ၁၀ ရက်(ယနေ့) တွင် သဂြိုဟ်မည်ဖြစ်ကြောင်း သိရသည်။
အဆိုပါဖြစ်စဉ်နှင့် ပတ်သက်ပြီး ကလေးငယ်ကို သတ်ဖြတ်ခဲ့သည့် တရားခံအား ဖမ်းဆီးပေးရန် လူမှုကွန်ရက်များတွင်လည်း တောင်းဆိုမှုများရှိနေသည်။
မြောက်ဒဂုံမြို့နယ်တွင် ပျောက်ဆုံးနေသည့် ကလေးငယ်ကို ဒဏ်ရာများနှင့်အတူ သေဆုံးလျက်ပြန်တွေ့
10 Jun, 2026
